ازاى ابقى جامد فى اللعبة ؟
💠ازاى ابقى جامد فى اللعبة دى💠
🔴فيه شوية عوامل بتتحكم فى نجاحك فى لعبة كمال الاجسام..هحاول الخصهم من وجهة نظرى فى كام نقطة..و عوامل النجاح مش معناها مين هيبقى اكبر واحد و احسن جسم..عوامل النجاح من وجهة نظرى يعنى نجاحك الشخصى و رضاك عن نفسك و وصولك لاهدافك
▪️اولا لازم تحط اهداف..ماينفعش تمشى عشوائى..لازم تحط اهداف واضحة..و احلم بحاجات كبيرة..بس برضو فى حدود امكانياتك
▪️ادرس عوامل النجاح كويس و اتعلم من خبرات السابقين
▪️ارسم خطط ازاى تحقق الحاجات دى..ارسم خطط و حط تخيلات و تصورات للمستقبل..لازم يكون عندك رؤية سليمة فى اطار الظروف و الامكانيات المتاحة
▪️استعد للفشل..مرة و اتنين و تلاتة..خليك بارد..افشل و اخسر و اتكفى على وشك..و بعدين قوم نفض هدومك و ماتبصش وراك و كمل الطريق
▪️استعد انك تفشل تانى عادى..مفيش حاجة بتيجى من اول مرة..و لو جت بتيجى حظ مش شطارة..افشل لحد ما تبقى متمكن من اللى بتعمله..و بعد كدة النجاح جاى جاى
▪️حارب عشان احلامك..ماتيأسش و ماتستسلمش..الموضوع مش اختيارى..و حاول تستمتع باللى بتعمله و بتوصله سواء نجاح او فشل عشان انت كدة كدة مكمل ..فشوف يعنى تكمل و انت قرفان و لا تكمل و انت مستمتع و مبسوط بكل خطوة
▪️فيه عوامل تانية خارجة عن ارادتك..زى اية؟
زى الفلوس..للأسف و بكل وضوح اللعبة محتاجة فلوس و مصاريف كتييييير جدا...جدا..لا مصاريف كتير فشخ..بس معنى كدة انك لازم تكون غنى..احنا مش بنتقدم فى اللعبة عشان مش عارفين نودى الفلوس فين..احنا بنخلق الفلوس للعبة!
▪️العوامل الوراثية..الجينات من اهم العوامل فى اللعبة..فيه ناس عندها جينات حلوة جدا مساعداها تعمل تقدم ملحوظ..و ناس جيناتها معانداها..بس فى النهاية الاساس تعبك و مجهودك..و ذكاءك فى انك تخبى عيوبك بحاجات تانية انت شاطر فيها
▪️الذكاء..من احد اهم العوامل.. و اللى اقصده بالذكاء هو تقديرك لذاتك و معرفتك لامكانياتك كويس..و اختيارك للاوقات و الاماكن اللى تقدر فيها تكسب بالامكانيات دى..
▪️العلم و الثقافة و التمكُن..اقراا كتيييير و ادرس و افهم اللعبة و خباياها و اسرارها..اتفرج على ناس بتلهمك و اتعلم منهم..اتمكن من طرق التمرين و طرق العرض و عزز ثقتك بنفسك..الحاجات دى مكتسبة مش موهبة و لا عطية من ربنا
▪️ماتعتمدش على امكانياتك بس..طور نفسك باستمرار و ماترضاش بالقليل..محمد صلاح اكبر مثال..صلاح موهوب بالفطرة بس موهبته كان اخرها تخليه فى بازل او يقعد دكة فى تشيلسى..انما هو قال لأ..صلاح راح ايطاليا و طور من نفسه فى الناحية البدنية و التكتيكية و بقى معلم و راسى و عربجى قدام الجون لحد ما بقى اهم لاعب فى الدورى الانجليزى دلوقتى..الموضوع مش مين موهوب اكتر..الموضوع مين مجتهد اكتر مش معتمد على امكانياته بس.
▪️ماتقارنش نفسك بحد..انت مش فى منافسة مع حد..انت فى منافسة مع نفسك..اتقدم على نفسك و اكسب نفسك..حقق نتايج افضل من اللى انت عملتها قبل كدة..مش افضل من اللى حد غيرك عملها..ابنى اسمك و ركز فى نفسك بس
▪️حب ما تلعب حتى تلعب ما تحب..اتمرن رجلين عشان تمرين الرجلين نص طريق النجاح فى اللعبة دى..ماتقولش مش قادر اتمرن رجل مابحبهاش يا كوتش..ما اسد يالا فى ايه؟!؟ العب رجل و افشخ نفسك فيها و بعدين ابقى اتمرن باى و تراى و بتاع ..
▪️للإستعلام عن برنامج التدريب الأونلاين تواصل على رقم (01091300610)
تعليقات
إرسال تعليق