الذاكرة العضلية
🔞 الذاكرة العضلية 🔞
👈 أما بتقرر إنك تعمل الصح ✔️✔️
وتنزل الجيم فى أجازة تانية ثانوى عشان تعمل فورمة
ولما تالتة ثانوى تخلص تروح تقدم شرطة وتحقق حلم حياتك
وفعلا قررت إنك تتمسك بهدفك ونزلت الجيم وعملت الفورمة بس اللى يخاف من العفريت يطلعله .👻☠️
تالته ثانوى خلصت ومجموعك مكنش عالى بس مش مشكلة هتلحق شرطة برده ، المشكلة الأكبر إن الفورمة راحت لما قعدت من الجيم ف الثانوية عشان بتلف ع الدروس .
البوست دا لكل واحد نزل جيم ولاى سبب من الاسباب انقطع بعدما عمل فورمة
تعالى احكيلك حكاية كدا بسيطة
اكيد شوفت كيفن ليفرونى السنة اللى فاتت ف مستر اوليمبيا وازاى رجع بسرعة رهيبة لكتلته العضلية مش هنقول انها احسن فورمة ليه بس يعتبر انجاز بالنسبة لعمره بغض النظر عن الهرمونات واساليب التدريب المختلفة وكل العوامل دى الذاكرة العضلية ليها دور مهم ف رجوعه لمستواه
⚫زمان كنت لما اسمع كلمة الذاكرة العضلية دى بقعد اتخيل ان العضلة فيها مكان لذاكرة او ميمورى بجد لحد ما شوفت فيلم بتوقيت القاهرة بتاع نور الشريف اللى كان عامل فيه دور راجل كبير عنده مرض ألزهايمر ( مرض فقدان الذاكرة) المهم هو كان عايز يدور ع صاحبة الصورة ف حط الصورة ف العربية ودور العربية وقام طالع بيها ( شايفك ياللى بتقول انجز واحنا مالنا وايه علاقة البار والدامبل بالكلام ده )
⚫المنطق هنا بيقول ازاى هو عنده زهايمر وفاكر سواقة العربيات ؟
من ساعتها يا جدعان وانا السؤال دا واكل دماغى
ازاى ناسى كل حاجه وفاكر السواقة ؟؟؟ وليه برده السباحة مبتتنسيش؟؟؟؟؟
وازاى كيفن ليفرونى رجع بسرعة وظهر بشكل مبهر ؟؟؟
🔰الحقيقة عشان نجاوب ع الاسئلة دى كلها عندنا نظريتين بيشرحوا ايه هى الذاكرة العضلية وازاى بتأثر ع سرعة اكتساب الكتلة العضلية ؟
⏪ أول نظرية ليها علاقة ب TE Data
- حضرتك النت عندك ضعيف اتصلت بخدمة العملاء قام قايلك رستر الراوتر يا فندم
الحل دا منفعش ف قالك خلاص هنبعتلك فنى ييجى يشووف المشكلة فين يا فندم
- جرس الباب رن الراجل جه .. يمين شمال عمال يحاول ف الكومبيوتر عندك وكل حاجه مزبوطة ولسه السرعة ضعيفة .
لحد ما قالك هو فين سلك النت شاورتله ع السلك اللى انت معديه من البلكونة وقافل عليه الشيش وباب البلكونة ، وبنظرة انتصار بصلك وقالك لازم نغير السلك يافندم عشان مليان تعاريج وفى اجزاء منه مقطوعة مكان قفلة الشيش عليه
وفعلا قام مغير السلك والنت اتصلح واديك دلوقتى عمال بتقرأ الكلام ده.
ايه علاقة الرغى دا كله بالذاكرة العضلية ؟
⚫ ببساطة العضلة عشان تنقبض بتبعت اشارات للمخ ان فى حمل واقع عليها ومقداره قد كدا وهى عايزة تنقبض عشان تشيله المخ يقوم محلل الكلام دا وباعت اشارة عصبية فيها اوامر للعضلة دى انها تنقبض
- كل اما الاشارة دى وصلت اسرع وبدون فقد ف اى جزء منها كل اما الانقباض كان كفأته افضل
دا نفس اللى حصل لما الراجل غير السلك قلل نسبة الفقد ف الاشارة اللى طالعة من الراوتر وبالتالى السرعة اتحسنت
- لحد كدا تمام .. طب ازاى هنغير سلوك العضلة يا معلم ؟؟
الفكرة ان كل اما انت بتكرر حركة معينة ( دامبل عالى ف تمرينة البنش مثلا) الحركة دى بتتحفظ ف جزء من مخك غير الجزء المختص بالذاكرة
وبيحصل ان الاعصاب اللى بتنقل الاشارات دى بتحاط بطبقة عازلة من نوع معين من الدهون بتقلل الفقد ف الاشارة العصبية ((myelin sheath ))
🔘طب وانا هستفاد ايه لما الاشارة توصل كاملة و اسرع ؟؟
- الاستفادة هنا هتكون ان كل ما الاشارة العصبية كانت اقوى كل ما عدد الياف عضلية اكتر هتشتغل
وكل اما عدد ألياف عضلية اكتر اشتغل كل اما اوزانك هتزيد اسرع وهيحصل تمزق للالياف دى واعادة اصلاح ليها ف وبالتالى هتستعيد الكتلة العضلية بتاعتك ف وقت اقل
🔰نيجى لتانى نظرية بتشرح الموضوع بتاعنا
⚫ من المعروف ان الخلية العضلية من اكبر الخلايا الموجوده ف جسم الانسان وعشان كدا بتبقى متعددة الانوية يعنى فيها اكتر من نواه
🔘طب وهو ايه فايدة النواه اصلا ؟؟
النواه دى تقدر تقول انها عقل الخلية .. كل حاجه بتحصل ف الخلية بتكون عن طريقها .. بمثابة رئيس مجلس ادارة الخلية يعنى
- المهم انت خلصت دراستك وشيلت المادتين وبقيت بيل جيتس العرب وفتحت مجموعة الشركات الخاصة بيك
وعشان انت مش هتقدر تاخد بالك من كل الشركات فقومت معين مدير جديد لكل شركة.
⏪ ده نفس اللى بيحصل ف العضلة لما بتكبر بيزيد عدد الانوية الموجوده جواها عشان تقدر تسيطر ع كل شىء وتأدى الوظايف بشكل سليم
⚫ الفلوس لعبت معاك بدأت تهمل ادارة الشركات بتاعتك
هوووووب قامت كل شركاتك قفلت وخسرت فلوسك يا صابر
بس شوية المديرين اللى انت عينتهم عندك طلعو ولاد حلال ومنسوش خيرك عليهم وقالولك العشرة متنهونش غير ع ولاد الحرام ولما قولتلهم هنبدأ من جديد وقفوا جنبك تانى
⏪ الحكاية دى بتحصل بالظبط في العضلة
حضرتك اتمرنت مثلا لمدة طويلة واكتسبت كتلة عضلية محترمة وفجأة انقطعت عن التمرين لمدة 6 شهور
اكيد هتخس عضلات بس الغريب ف الموضوع ان عدد الانوية اللى زادت نتيجة لزيادة الكتلة العضلية فضل ثابت ولم يقل ، ولما هترجع للتدريب تانى العدد الكبير للانوية دى بيسهل اكتساب الكتلة العضلية من تانى .
ودى كدا حكاية الذاكرة العضلية
عرفت كيفن ليفرونى رجع بسرعة ازاى .
-------------------------------------
ده فيديو بيوضح النظرية الاولى وممكن تشغل الترجمة بالعربى عشان تفهم اكتر
https://www.youtube.com/watch?v=f2O6mQkFiiw&t=12s
ودى المصادر :
http://www.exercisebiology.com/index.php/site/articles/muscle_memory_solved
https://www.ncbi.nlm.nih.gov/pubmed/22582213
http://www.thebioneer.com/why-muscle-grows-back-more-quickly-its-not-muscle-memory/
http://jap.physiology.org/content/113/2/290.long
▪️للإستعلام عن برنامج التدريب الأونلاين تواصل على رقم (01091300610)
تعليقات
إرسال تعليق