أشهر علامات المدرب الفاشل.

شباب كتير بيكون نفسه يحقق حلمه ويوصل لشكل الجسم اللي بيحلم بيه فبيروح لمدرب يساعده في تحقيق الهدف ده .. قبل ما تدفع فلوس وتحط أحلامك بين إيدين مدرب -سواء في الجيم أو أونلاين- لازم تكون قادر تفرق بين المدرب الحقيقي وبين المدرب الأي كلام .. عارف إن اللي هقوله ده هيزعل مدربين كتير مني لكن للأسف لازم يتقال علشان محدش يستغلكم أو يضحك عليكم .

من خلال وجودي في المجال الرياضي والتدريب شوفت أنواع كتيرة من المدربين ، في منهم اللي دارس دراسة أكاديمية ومنهم اللي دارس دراسة شخصية ومنهم اللي مش دارس أصلا وبيعتبر التدريب سبوبة وفي الشاطر وفي اللي ملهوش علاقة بالتدريب غير إنه عنده شوية عضلات .

⛔️ علشان تعرف تختار مدربك صح هقولك العلامات اللي لو لقيتها في مدربك لازم تغيره فورا :

1️⃣ عايز يبيعلك مكملات غذائية أو هرمونات
أكبر علامة ممكن تبينلك المدرب اللي معاك -سواء مدرب في الجيم أو أونلاين- أمين أو بيستغلك أو مش فاهم هي إنه يحاول يقنعك بضرورة مكمل غذائي عنده علشان يبيعهولك ، أو يطلب منك قايمة بمكملات كتير تجيبها علشان توصل لهدفك أو الأسوأ والأسوأ إنه يقترح عليك تدخل طريق الهرمونات .
لو كنت شخص مبتدأ فالمكملات بكل أنواعها مش مهمة ومش ضرورية ومش هي اللي هتوصلك لهدفك ، وطبعا مش محتاحين نتكلم عن الهرمونات ، لو المدرب بتاعك من النوع ده سيبه .

2️⃣ بينتقد شكل جسمك علشان يحفزك
في طرق كتير للتحفيز على التمرين والدايت ، لكن أسوأهم هي التريقة والسخرية من شكل جسم المتدرب ، الطريقة دي مهينة وبتخليك تفكر بطريقة سلبية وبتسبب إحباط .
في بعض المدربين بيستخدموا الطريقة دي على أساس إن الشخص اللي معاك كده هيحب يتمرن ويلتزم أكتر ، لو المدرب بتاعك بيقولك كده سيبه فورا ودور على مدرب بيحترمك ويشجعك بطريقة إيجابية ويحببك في نفسك .

3️⃣ بيمرنك بنمط تدريبي واحد طول الوقت
في أنظمة تدريبية كتيرة جدا إخترعوها في العالم وكلها محققة نتايج عظيمة زي ال (Prosplit - upper&lower - push pull leg - plyometrics ..etc) والتنويع مابين تمارين القوة والتحمل .
كل إسلوب له إيجابيات وسلبيات لكن في مدربين شايفين إن الطريقة اللي بيمرنوا بيها هي الوحيدة الناجحة واللي لازم كل الناس تتمرن بيها ، وده بيكون مدرب ضيق الأفق أو عديم الخبرة .
تمرينك لازم يكون متنوع ومتقسم لفترات مابين القوة والتحمل والمرونة والبناء العضلي والتنشيف .. لو مدربك مش ماشي معاك على خطة واضحة يبقى أكيد مش هو ده المدرب اللي هتكون حابب تتمرن معاه .

4️⃣ مهتم بنزول الوزن أكتر من زيادة العضلات
المدربين اللي بيركزوا إنهم يخسسوا الناس اللي معاهم أكتر من تركيزهم إنهم يبنولهم عضلات دول في رأيي أفشل فئة مدربين ممكن حظك يوقعك فيهم .
لو إهتميت بنزول وزنك بس يبقى هتفقد كتلة عضلية كبيرة جدا وهتكتشف إن شكلك بيتحول للأسوأ غير قوتك العضلية اللي بتقل تدريجيا ، أفضل طريقة ممكن يستخدمها معاك المدرب الشاطر إنه يساعدك تبني حجم عضلي أكبر وإنت بتخس ، لإنك لو عملت عضلات أكتر هتخس أكتر وشكلك هيتحسن أكتر .
لو المدرب بتاعك بيخليك تلعب كارديو بس طول الوقت ومش بيخليك تشيل حديد أنصحك توفر فلوسك وتتمرن لوحدك علشان الجري على التريدميل مش محتاج مدرب .

5️⃣ مش بيعلمك ولا بيساعدك تفهم أكتر
في نوعية من المدربين بيتبعوا سياسة -غبية- معينة وهي إنه مايقولش للمتدرب على معلومات كتير أو يفهمه علشان يفضل محتاجله ويفضل يدفعله فلوس .
لو حاسس إن الكابتن بتاعك من النوعية دي وبيبخل عليك بالمعلومة وبيخبيها يبقى تأكد إنه بيستغلك ماديا وآخر حاجة بيدور عليها هي مصلحتك ومش عايز يساعدك ، أو إنه عديم الخبرة والثقافة ومش عايز يفهمك علشان ماتكتشفش جهله .
المدرب جزء كبير من إلتزاماته تجاهك هي إنه زي ما بيعملك فورمة كمان يعلمك ويفهمك كل تمرين لزمته إيه والدايت ده فايدته إيه ، ومفيش حاجة إسمها سر المهنة .
لو كنت مدرب بيعلم الناس وبيديهم من خبرته صدقني دي  أفضل وأنجح طريقه تحافظ عليهم بيها وتكسب منها فلوس لإنهم بيثقوا فيك وبيتمسكوا بيك وبيكونوا أنشط وسيلة دعاية وتسويق ليك .. دور على كابتن يعلمك قبل ما يعملك فورمة .

6️⃣ بيوعدك بتحقيق نتايج سريعة
معظم الناس بتبدأ تمرين ومتصورين إنهم هيوصلوا لهدفهم بعد شهر تدريب ، عارف إن اللي هقوله ده ممكن يكون محبط لكن هي الحقيقة ، علشان توصل لهدفك هتحتاج شهور وشهور من التعب والإلتزام والصبر ، لازم تقتنع بكده علشان ما تسمحش لأي مدرب يستغلك ويبيعلك حلم وهمي وياخد منك فلوس كتير وفي الآخر يكون سبب في إحباطك ، اللي يقولك هتخس 20 كيلو في شهر سيبه وإمشي
واللي يقولك هزودك 30 كيلو عضلات في شهرين سيبه وإمشي .
علشان تخس محتاج وقت ، علشان تعمل عضلات محتاج وقت ، علشان تزود قوتك محتاج وقت .. دور على مدرب أمين معاك علشان ماتضيعش وقت

7️⃣ بيقولك كلام مش علمي وبيردد إشاعات
في فئة من المدربين مش مهتمين يطوروا من نفسهم ومن خبرتهم وثقافتهم ولسة معتمدين على المعلومات اللي سمعوها من زمان وبيتعاملوا بيها إنها حقائق مسلمة ، ولسة مقتنع إن التكرارات الكتير بتنشف وإن الجسم محتاج 400 جرام بروتين في اليوم .
النوع ده بتلاقيه لا عمره قرا كتاب في التغذية ولا دور على بحث علمي ولا حضر ندوة تعليمية حتى ، لو الكابتن بتاعك من النوع ده لازم تشوف مدرب تاني في أسرع وقت .


 للإستعلام عن برنامج التدريب الأونلاين تواصل على رقم     (01091300610)